Anna Hazare-an lungawi lohna lantir tum a ṭhulh

Social activist Anna Hazare chuan Maharashtra sorkarin wine policy a siam duh lohna lantira tiam chin awm loa chaw ngheia nawrh huaihawt a tum chu a ṭhulh.

Pathiannia chanchinbu mite a kawmnaah Hazare chuan, "Maharashtra sorkarin wine policy a siam vanga chaw nghei ka tumna chu ṭhulh leh rih a ni. A chhan chu a kaihhnawih department secretary hnen aṭangin lehkha ka dawng a, he policy kalpui a nih hmain mipui ngaihdan lak hmasak phawt an tum tih min tiam a ni," a ti.

Anna Hazare hian Maharashtra sorkarin supermarket leh walk-in store-a wine zawrh an tumna chu dodalin, nimin (February 14) aṭang khan tiam chin awm loin chaw nghei a tum thu hi a hmain a lo sawi a ni. Nawrh huaihawt a tum chungchangah hian Maharashtra chief minister Uddhav Thackeray hnenah pawh lehkha a thawn bawk. "Sorkarin hnathawktute leh state chhunga mipuite ngaihdan la loa wine zawrh chhuah an tum a nih chuan kan chetchhuah a ngai dawn a, February 14 hian Ralegan Siddhi-a Yadav Baba temple aṭangin loh theih lohin hunger strike ka ṭan a ngai dawn a ni," tiin a lo sawi tawh a ni.

"Sorkarin he policy a siamna chhan hi wine aṭanga chhiah a lakluh tur, wine siamtute leh zuartute ngaihdan ringawt a thlir vang niin a sawi. Mahse he policy hi kalpui anih chuan state chhunga naupang zawkte ngawl veinaah a hruai lut thei a, hmeichhia tam takin a nghawng an tuar dawn bawk a ni," a ti.

Hazare chuan Chief minister hnehah hian lehkha ṭum hnih a thawn tawh thu leh chhanna a la dawn loh thu a sawi bawk.

Maharashtra sorkar chuan state chhunga supermarket leh walk-in store-a wine hralhchhuah phalna licensing fee, Rs 5,000-in a pechhuak tawh a ni. State cabinet tarlan danin, he thutlukna hi India rama wine siamchhuaktute tana hralhchhuahna kawng awlsam zawkna tura a tih an ni.