India-in Chinese app 54 a khap belh leh

India chuan ram himna tiderthawng theia a ngaih, Chinese app 54 khapna a tihchhuah belh leh.

Ministry of electronics and information technology chuan nimin khan Chinese app khap belh a nih thu hi puangin, "Heng app 54-ah hian thil pawimawh leh user data dan loa lak khawm hrang hrangte a tel a ni. Real-time data lakkhawm chu dik lo taka hmangin, ram dangah server-ahte a thawn leh ṭhin a ni," tiin a tarlang.

Nikum June thla khan, India chuan Chinese mobile application 59 a lo khap tawh a, heng zingah hian TikTok, WeChat leh Helo-te chu ram inpumkhatna leh venhimna tiderthawng thei nia sawiin khap zingah hian an tel a ni. Heng apps-te hi Section 69A of the Information Technology Act hnuaiah khap an nih thu Ministry of Electronics and Information Technology chuan a sawi.

Kum 2020, May thlaa ramri chungchanga China nena intihbuaina an neih hnu khan India chuan Chinese app 321 a khap tawh a ni.

Khapna thupek hmasa ber hi Ladakh khawchhak lam, Galwan Valley-ah China sipaite nen an intihbuainaa India sipai 20 kaphlum an nih hnu lawk, kum 2020 June thla khan tihchhuah a ni. Kum 2020, May 5-a Ladakh khawchhak lam ramriah India leh China sipaite inkarah buaina nasa tak chhuakin, he buaina thlen hnu hian ram pahnihte chuan ramri sipai sang tel bakah ralthuamte an dah luh belh nghal a ni. Hemi kum vek, June 15 khan buaina hi chhuak lehin, Galwan Valley-ah ralthuam nena inbeihna rapthlak tak a chhuak zui leh a ni.

Sorkar laipuiin nimina Chinese app a khap belh leh zingah hian Sweet Selfie HD, Beauty Camera - Selfie Camera, Garena Free Fire - Illuminate, Viva Video Editor, Tencent Xriver, Onmyoji Arena, AppLock leh Dual Space Lite-te an tel.