Ram pawn aṭanga lutte inkhunghran ngai tawh lo

Union ministry of health and family welfare-in ram pawn aṭanga rawn lutte chungchanga Covid kaihhruaina a siamte chu ennawnin, nimin aṭang khan ni sarih chhung inkhunghrang phawt zel tura tih chu tihtawp a ni.

Ram dang aṭanga rawn lutte hi in lama inkhunghrang tura tih ni tawh lo mah se, ni 14 chhung chu an hriselna dinhmunte anmahniin uluk takin an enfiah reng tur a ni a, Covid-19 symptom an neih chuan inkhunghrangin, an hnaih ber health facility-ah an in report tur tih a ni.

Delhi an rawn thlen a, airport-a screening neihnaah symptom neite chu medical facility lamah hruai an ni ang a, Covid hri an kai tih hmuhchhuah a nih chuan an contact-te pawh test ve leh an ni ang. Khualzin rawn lut, Covid-19 kaite chu genome sequencing tih turin an sample thawn zel a ni ang.