Ranchaw man tichingpena puhnaah Lalu Yadav thiam loh chantir leh

Jharkhand-a Central Bureau of Investigation (CBI) special court chuan nimin khan Rashtriya Janata Dal (RJD) hruaitu leh Bihar chief minister hlui, Lalu Prasad Yadav chu ranchaw man, cheng vaibelchhe 139.5 tichingpena puhna thubuaiah thiam loh

a chantir.

Lalu Yadav hi sorkar laipui aṭanga ranchaw man leina tur sum tam tham tak an dawn tichingpena puhna thubuai pangaa thiam loh chantir a ni ta a ni.

Ranchi, Jharkhand-a CBI special court-in a chungthu ngaihtuah a, thiam loh a chantir lai hian Lalu Yadav pawh hi court-ah hian a awm ve a ni. Court-ah hian he thubuaia inhnamhnawiha puh mi dang 98 pawh an awm a, an zinga 24 chu thiam chantir an ni. Midang 35-te chu kum thum tang tura hrem an ni thung a, hrem zingah hian MP hlui Jagdish Sharma leh sum tihchingpen thlen hun laia Public Accounts Committee (PAC) chairman Dhruv Bhagat-te pawh an tel.

Court chuan February 21-ah Lalu Yadav leh midang 39-te hremna hi a tichhuak ang.

Lalu Yadav hi a hmain thubuai pali, dik lo taka Chaibasa treasury aṭanga ran chaw man tur Rs vbc 37.7 leh Rs vbc 33.23, Deoghar treasury aṭanga Rs vbc 89.27 leh Dumka treasury aṭanga Rs vbc 3.76 lachhuaka puhnaah thiam loh chantir a lo ni tawh bawk. Hengte hi kum 1991-1996 inkar, Bihar Chief Minister a nih laia mi vek an ni. Mahse heng thubuai palia thiam loh chantir a nihna hi a khing let leh vek a ni.

Thiam loh chantir a nihna, thubuai paliah hian Lalu Yadav hi kum 14 tang tura hrem niin, a paliah hian bail-in a chhuak mek a ni. Kum 73 mi, Lalu Yadav hi kum 2017, December thla khan jail-ah dah a ni a, mahse a hriselna ṭha lo avangin a hun tam zawk chu Rajendra Institute of Medical Sciences-ah a hmang a, nikum January thla khan Delhi-ah enkawl tura hruai thlak a lo ni tawh bawk. Bail-in chhuak mek mah se, thiam loh chantir a nih tharna thubuaiah hian kum thum aia tam tang tur hrem a nih chuan jail-ah a kir leh a ngai ang.