Indian embassy-in Ukraine chhuahsan turin India mite ngen

Ukraine khawpui Kyiv-a Indian Embassy chuan nimin khan India mi, a bikin zirlaite chu buaina lian tham chhuak mai thei reng a nih avangin Ukraine chhuahsan vat turin a ngen.

"Ukraine-a India mi, a bikin zirlaite chu he ram hi chhuahsan rih turin kan ngen a ni. India khua leh tuite pawh Ukraine-ah ṭul bik thilah lo chuan zin lut lo turin kan chah bawk a ni," tiin Embassy of India chuan thuchhuah a siam. Hei bakah hian Ukraine rama India mi awm mekte chu biakpawh an nih theihna tur an khawsak dan leh an awmna hmunte Embassy hriattir turin an chah bawk.

Thawhṭanni khan United States chuan Ukraine ramria Russia sipai inkulh zel vangin Kyiv-a an embassy chu Ukraine khawthlang ram, Lviv-ah an sawn thu an lo puang tawh bawk a ni. US chuan an ram palaite chu Ukraine chhuahsan tura a ngen hnuah, embassy staff tam zawk chu Lviv-ah hian a sawn nghal a ni.

Hetih lai hian United Nations hotu Antonio Guterres chuan Russia leh Ukraine foreign minister-te chu biain, ram pahnih inkar boruak sang chho mekah boruak tidai tura ram palaite inbiakna neih thuai a ṭul thu a hrilh.

Ukraine ramriah hian Russia chuan sipai nuai khat chuang a dah mek a, Ukraine ram run a tum nia puhna erawh a pha reng thung. Mahse khawthlang ramte chuan Russia hi Ukraine ram beia che chhuak thei reng a ni tawh niin an sawi.