Mipuite hian Kim Jong pahnihna an duh em? : Rakesh Tikait

Loneitu pawl hruaitu, Rakesth Tikait chuan Uttar Pradesh assembly inthlan neih mek karah, UP leh central-a rorellai BJP chu na takin a bei a, mipuite chu Kim Jong-un pahnihna an duh em tih ngaihtuah a, vote an thlak hmain ngaihtuahna uluk taka seng turin a chah.

"Mipuite chuan mipuite aiawh zo Chief Minister leh Prime Minister nge an duh a, North Korea anga awm a, Kim Jong pahnihna neih tih an thlan a ngai a ni. State tinte hian mimal rorelna sorkar kan duh lo. Hei vang hian mipuite chu an vote neihte fing taka hmang a, ngaihtuahna uluk taka seng turin kan ngen a ni," a ti.

Rakesh Tikait hian kar liam ta khan BJP chu an khua, Muzaffarnagar-ah campaign uchuak taka kalpuiah puhin, Hindu leh Muslim inbeihna tur a nih loh thu a sawi. "Uttar Pradesh khawthlang lam hian hmasawnna lam an sawi duh a. Hindu, Muslim, Jinnah, sakhaw lam sawite chuan vote an hmu lo ang. Muzaffarnagar hi Hindu-Muslim inbeihna tur stadium a ni lo," tiin Tikait chuan twitter kaltlangin a sawi.

Tikait chuan loneitute chuan hmasawnna leh ni tin khawsak mamawh chungchang, kawlphetha leh tui lam an ngai pawimawh tih a sawi a, "Loneitute dodal lotute chu voter-te pawhin an duh vek ang. Hindu leh Muslim voter thliar hrang lote an ṭan a ni. Mipuite hian Pakistan leh Jinnah chungchang ringawt buaipui lo, mipuite harsatna ngaihventute zawk chu an duhsak zawk dawn a ni," a ti.

Central-a BJP kaihhruai NDA sorkain farm law a siam duh lohna lantir a, loneitu pawl hrang hrangten thla 11 zet Delhi border-a nawrh an huaihawtnaah khan Tikait hi a khaipa ber a ni. Hun rei tak nawrh huaihawt a nih hnuah sorkar chuan Farm Law pathum a siam tharte chu a sut a, hemi hnu hian loneitute pawhin an nawrh hi an titawp ve nghal bawk a ni.