Bihar CM atan Nitish Kumar thlang

Bihar assembly inthlan neih zawh taka hnehna changtu, National Demo­cratic Alliance (NDA) hnuaia party thawkhote chu nimin khan Chief Minister official residence-ah inhmukhawmin, Janata Dal (United) president Nitish Kumar chu Chief Minister atan an thlang leh. Vawiinah sorkar thar hi  lakluh a ni ang. 

Nimina meeting neihah hian NDA hnuaia thawkho, BJP, JD(U), HAM-S leh VIP MLA thar 125 te an tel kim vek a ni. Meeting zawh hnuah Nitish Kumar chu Govenor House-ah kalin, sorkar thar an siam theih thu ziakin a thlen a, amah thlawptu MLA te hming nen a thehlut nghal a ni. NDA hi independent MLA pakhatin a thlawp bawk. 

Seat 243 awmna, Bihar Legislative Assembly inthlanah rorellai NDA hian hnehna chang lehin, seat 125 an la a ni. BJP in seat 74 a la a, JD-U in 43 lain, an thawhpui dang party pahnihte chuan seat riat an la bawk. 

Hetih lai hian Rashtriya Janata Dal (RJD) kaihhruai eptu ṭangrual pawl, Mahagathbandhan chuan seat 110 an la thung. RJD hi party mala seat la hnem ber niin, seat 75 a la a ni. 

NDA legislator meeting-ah hruaitu atana thlan a nih leh tak avangin Nitish Kumar chuan a zawnin Bihar Chief Minister term lina a chelh dawn a ni. 

Kumin inthlanah Kumar party, JD-U hi a che ṭha lo hle a, kum 2015 inthlana seat 71 a lak theih laiin kuminah erawh seat 43 chauh a la pha. Mahse inthlan dawna an campaign auhlaah BJP chuan NDA-in sorkar a siam leh a nih chuan Nitish Kumar chu CM a nih chhunzawm zel tur thu a lo sawi tawh a, hei vang hian member nei tlem zawk mah se an lo tiam tawh angin CM atan dah chhunzawm a ni dawn ta a ni. 

BJP hruaitu Sushil Modi chu deputy Chief Minister atan dah a ni leh ang.