Russia Covid-19 vaccine Sputnik V Kanpur Medical College -ah enchhin dawn
Russia Covid-19 vaccine, Sputnik V batch hmasa ber chu karleh chhung hian Kanpur-a Ganesh Shankar Vidyarthi Medical College-ah a lo thlen hman rin niin hetah hian mihringa enchhinna, thawh hnihna leh thawh thumna neih a ni ang.
Dr Reddy's Laboratory-in Drugs Controller General of India (DCGI) hnen aṭanga phalna a hmuh hnuah mihringa enchhinna hi neih theih a ni dawn tih official-te chuan an sawi. College principal RB Kamal chuan karleh chhungin mihringa enchhinna hi neih a ni dawn tih PTI a hrilh.
RB Kamal chuan mihringa enchhinna nei tur hian volunteer 180 lai an nei tih sawiin research tihna kawnga hotu ber Saurabh Agarwal chuan damdawi dose hi a endik dawn tih a sawi bawk a, dose khat an pek hnuah volunteer-te dinhmun azirin dose dang an mamawh dawn em tih enfiah zui a nih dawn thu a sawi a ni.
Volunteer-tea damdawi thawh dan hi thla sarih chhung vel dose pek an nih hnuah zirchian a ni dawn tih sawiin ni 21 danah vawi hnih emaw vawi thum endik a ni ang.
Sputnik V hi -20 aṭanga -70 degrees Celsius-a dah a ngai dawn a ni.
Spetember thla khan Dr Reddy leh Russian Direct Investment Fund (RDIF), Russia sovereign wealth fund-te chuan India rama Sputnik V clinical trial neihna tur hian inremna an siam a, he inremna hnuaiah hian RDIF hian dose maktaduai 100 chu India ramah an supply ang.
August 11 khan Russia Ministry of Health hnuaiah Sputnik V hi register fel niin khawvela Covid-19 kaihhnawih damdawi 'human adenoviral vector platform' behchhan register hmasak ber a ni.