Positivity rate 2.45%-ah tla thla tawh

India ramah Covid-19 hri kai thar an tlahniam zel a, ni khata hri kai hmuhchhuah, daily positivity rate pawh 2.45% ah a tla thla tawh.

Union health ministry-in nimin zinga data a tihchhuah tharah, Thawhlehni khan India ram pumah hri kai thar 30,615 awmin, hri vanga thi mi 514 an awm bawk. Ni 10 chhung chu a zawnin ni khata hri kai thar hi nuai khat hnuai lam a ni tawh.

Hri kai mek, active case pawh tla hniam zelin, Thawhlehnia active case 3,70,240 chu hri kai hmuh chhuah tawh aṭanga 0.87% a ni. Hri kai enkawl dam, recovery rate pawh a sang chho leh tawh a, 97.94% a tling leh tawh tih health ministry chuan a sawi.

India ramah Covid-19 hri thipui mi 5,09,872 awm tawhin, heng zinga 1,43,451 chu Maharashtra state-a mi an ni a, Kerala-ah mi 62,681, Karnataka-ah 39,691, Tamil Nadu-ah 37,946, Delhi-ah 26,081, Uttar Pradesh-ah 23,404 leh West Bengal-ah mi 21,061 in he hripui hi an thihpui tawh a ni. Health ministry chuan India rama Covid-19 thihpui zinga 70% chuang chu natna benvawn nei an ni tih a sawi a ni.

Mumbai khawpuiah chuan January 2 hnuah a ṭum khatna turin Thawhlehni khan Covid-19 vanga thi an awm lo a, khawpui chhunga hri kai thar pawh tlahniam hlein mi 235 an awm a ni.

Hri kai thar an tlakhniam zel avangin state eng emaw zat chuan Covid khuahkhirhna an siamte pawh an thlahdul chho mek a, school-te pawh an hawng leh ṭan tawh a ni. Assam chuan Thawhlehni aṭang khan Covid khuahkhirhna a siam zawng zawngte hlip vekin, state zinga khuahkhirhna siam hlip vek hmasa ber a ni.