Karnataka-ah hijab vanga buaina awm zui zel

Karnataka college-a Muslim hmeichhiate lu khuhna, hijab hman phal loh chungchang chu High Court lamah thlen ni tawh mah se, buaina a la awm zui zel.

Nimin khan Karnataka hmarlam, Vijayapura-a Government PU college chuan hijab hmang zirlaite chu classroom-ah an luh an phal lo. He college hian a hma chuan hijab hman hi a phalsak ṭhin a ni. Mahse college thuneitute chuan hijab vanga state chhunga zirna ina buaina a chhuah hnua High Court-in interim order a tihchhuahah, school leh college-ah sakhaw kaihhnawih thuam inbel a khapna chu an zawm mai niin an sawi. Mahse zirlaite hian a hmaa an phalsak, tuna phal a ni ta lo hi engmah hriattir lawk an ni lo tih an sawi ve thung.

College principal chuan High Court thupek an zawm mai tih sawiin, hijab leh saffron shawl-te chu zirna in chhungah inbel an remti lo tih a sawi. Gate-ah zirlait nena hun eng emaw chen inhnialbuaiin, zirlaite hi rorelna dik an duh thute an aukhum a ni. Mahse he hmunah hian police-te thlengin boruak ṭha lo erawh a chhuak zui ta lo a ni.

Karnataka-ah hian Udupi district-a college pakhatin hijab hmang, Muslim zirlai hmeichhe parukte class chhunga awm a phal loh avangin Hijab chungchanga buaina hi a rawn chhuak a ni. Muslim zirlaite chuan sakhaw inthliarna nia sawiin lungawi lohna an lantir zui a ni. He thil thlen hnuah Hindu zirlaite chuan zirna inah saffron shawl-te an bat lui ve leh a, state chhung hmun dangah pawh buaina hi a chhuak zui a ni.

High Court-ah pawh zualko a nih hnuin, court chuan interim order a tichhuak a, zirna inah sakhaw kaihhnawih thuam inbel khapna thupek a tichhuak nghal a ni. Hemi chungchangah Supreme Court inrawlh tura ngenna erawh chief justice of India NR Ramana chuan ṭul hun nia an ngaihah chauh a inrawlh dawn tih a sawi thung.