Sorkar laipuiin Corbevax vaccine supply hmasa ber dawng

Sorkar laipui chuan Thawhlehni khan naupang kum 12-18 inkar tana Covid-19 vaccine hman tur, Corbevax vaccine supply hmasa ber chu a siamtu, Biological E hnen aṭangin a dawng.

Drugs Controller General of India (DGCI) chuan Corbevax vaccine hi kum 12-18 inkar atana hman tura a remtih hnuah sorkarah hian supply nghal a ni. Nikum December thla khan DGCI hian he vaccine hi puitling tan emergency bikah hman a lo remti tawh bawk.

Nikum khan sorkar laipui chuan Hyderabad-a hmunpui nei, Biological E hnenah a vaccine siam, dose maktaduai 300 order-in, cheng vaibelchhe 1,500 a lo pe lawk tawh a ni. Biological E chuan Corbevax hi dose maktaduai 250 a siam zo tawh tih sawiin, a bak hi kar reiloteah siam zawh hman a tum thu a sawi.

Union health ministry chuan Corbevax hi India ramah RBD protein sub-unit Covid vaccine siamchhuah hmasa ber a ni tih a sawi a, Bharat Biotech siam Covaxin nen kum 18 hnuai lam tana Covid-19 vaccine atana pawm awmchhun an la ni.

Covaxin hi tleirawl, kum 15-18 inkarte hnenah pek mek a ni a, sorkar laipui chuan kum 15 hnuai lamte Covid vaccine pek an nih dawn leh dawn loh hi a la tichiang lo.