Sorkar laipuiin State/UT khuahkhirhna siambelhte titawp turin ngen

India rama Covid-19 hri leng chuan ziaawm lam a pan mek zel avangin, sorkar laipui chuan Nilaini khan state leh union territory-te chu Covid chungchang khuahkhirhna an siam belhte chu titawp emaw, ennawn emaw turin a ngen.

State/UT hnena lehkha a thawnah, union health secretary Rajesh Bhushan chuan, "India rama Covid-19 hri leng chuan January 21, 2022 aṭang khan tlakhniam lam a pan zel a ni. Kar hmasaa nitin chawhruala hri kai zat chu mi 50,476 niin, darkar 24 liamtaa chhinchhiah zat chu mi 27,409 an ni. February 15-a nitina hri kai zat, daily case positivity chu 3.63% in a tlahniam tawh bawk," tiin a ziak.

Union Health Secretary chuan sorkar laipui chuan Covid kaihhruaina a siamte pawh thlakin, khawvel huapa Covid-19 hri leng dinhmun thlirin a thlahdul dawn a ni, a ti. Hemi rual hian state/UT-ten Covid khuahkhirhna an lo siam belhte pawh an ennawn a, hri kai thar dinhmun a zira an tihtawp emaw, an siamṭhat chu a ṭangkai dawn tih a sawi bawk.

February 10, 2022 aṭang khan international travel guidelines pawh siamṭhat a ni tawh tih Bushan chuan a sawi. State sorkar-te chu mipui leh eizawnna chetvelna tibuai lo zawnga an ramri leh airport ṭheuha inkaihhruaina an siam chu thlahdul turin a ngen a ni.

Hemi rual hian Union Health Secretary chuan state leh UT-te chu nitin hri kai awm dan uluk taka thlithlai reng tura chahin, test, track, treat, vaccination leh Covid appropriate behaviour (five-fold strategy)-te kengkawh ṭha turin a ngen bawk.