BJP hian economic policy an hrethiam lo : Manmohan Singh

Prime minister hlui leh Congress hruaitu, Manmohan Singh chuan prime minister Narendra Modi kaihhruai BJP sorkar chu na taka beiin, economic policy hrethiam lo, economic leh foreign policy chhe tak neiah a puh.

PM hlui Singh chuan BJP sorkar chuan kum sarih leh a chanve liamta chhunga a tihsualte siamṭhat tumna aiin, India ram prime minister Jawaharlal Nehru chu an bei vak zawk niin a sawi. "Prime Minister post hi a pawimawh hle. History lam mawhpuh a, an beih vak ringawt hian an tihsual a siamṭha chuang lo a ni," tiin kum 10 chhung Prime Minister dinhmun a chelh chhung khan ṭawng vak vak loin a hnaah a insawrbing zawk tih a sawi.

Singh chuan BJP chuan mipuite ṭhendarhah a puh bawk a, "Politics lama hlawkna ka hmuh theihna turin ram mipuite inṭhendarhna tur thil engmah ka ti lo. Ram leh Prime Minister post zahawmna ka tihmelhem hek lo. Chona nasa tak karah kan ram zahawmna chu ka chawisang zawk a ni," a ti.

BJP chu bei chhunzawm zelin, BJP sorkarin ram a hmangaih dan chu British-in divide and rule policy a kalpui ang kha a nih thu a sawi.

BJP kaihhruai sorkar laipui economic policy chu sawisel bawkin, Singh chuan BJP sorkar chu economic policy hrethiam loah a puh a, foreign policy lamah pawh a hlawhchham a ni, a ti. Economic policy dik lo avangin ram chhungah unemployment rate-in a san lai a tawng chho a, zirlai, hmeichhia, sumdawng leh loneitute thlengin an lungawi lo vek a ni, tiin a sawi. "Khawtlanga intluktlan lohna a nasa a, mipuite leiba a pung zel a, sum lakluh erawh a tlahniam zel thung. Mi hausa an hausak belh a, mirethei dinhmun erawh a chhe telh telh thung a ni. Mahse sorkar chuan thil nih dan dik tak pholang duh loin, mipuite hmaah a nihna dik tawk lo an pholang a, thil engkim a ṭha e tiin a sawi leh mai a ni," a ti. Sorkarin a lem maia ram a hmangaih hi thil hlauhawm tak a ni tih a sawi tel bawk.

Chak lo, ngawi reng leh eirukna chawilar nia puhtu BJP chu ram mipuite hmaa an nihna dik tak pholan a ni ta chu a lawm thu sawiin Manmohan Singh chuan, " Ram mipuite chuan Congress hnathawh ṭha tak takte kha an hrereng a ni," a ti.