Two wheeler-a phurh naupangte tan Helmet leh safety harness hman vek ngai dawn

Union transport ministry-in Nilainia thuchhuah a siam chuan, nakkum February thla aṭangin India ram chhungah naupang thla 9-kum li inkar, two-wheeler-a phurhte chuan helmet leh safety harness an hman vek a ngai tawh dawn tih a sawi.

Naupang kum li hnuai lam phur, lirthei ke hnihte tlanchak theih chin, maximum speed pawh darkar khatah km 40 chin a ni bawk. Kum li chin chunglamte chu Motor Vehicles Act in a huam tawh a, kum 2016 khan naupang kum li chin chunglamte chu two-wheeler-a an chuan laiin helmet an khum vekna tur tih dan hi sorkar laipui chuan a lo pawm tawh a ni.

Nikum October thla aṭang khan Central Motor Vehicles Act siamṭhat chungchangah ministry chuan mipuite ngaihdan a la a, hemi hnu hian he dan siamṭhatna hi Thawhlehni khan a tichhuak ta a ni. Mahse he dan hi notification tihchhuah a nih aṭanga kum khat hnuah hman ṭan tur tih a nih avangin, nakkum February 15 aṭangin dan thar hi hman a ni ang. He dan hi hman a nih hnuah dan bawhchhaite chu Rs 1,000 chawitir bakah, driver license pawh thla thum chhung hrensak theih a ni ang.

Sorkar data-in a tarlan danin, India rama motor maktaduai 277.1 awm zinga 75% hi two-wheeler an ni. Delhi khawpui bikah pawh motor register maktaduai 13 zingah maktaduai 7.3 chu two-wheeler an ni.

Bureau of Indian Standards-te chu naupangte tana safety harness leh crash helmet zirchianna nei a, tehfung lo siam tura tih an nih thu transport official chuan a sawi. "BIS-in India rama hman tura a duan ang a lo chhuah hma chuan European standard hman phal a ni," tiin "BIS chu dan ang taka siamchhuahin a lo chhuak thuai ang," a ti. Ministry chuan naupang hman tur safety harness hi zang, awlsam, waterproof leh tlo tak anih tur thu a sawi.