Ahmedabad-a bomb tihpuahnaa inhnamhnawih Mi 38-te thi turin an chungthu relsak

Gujarat court chuan kum 2008-a Ahmedabad-a ṭum eng emaw zat bomb tihpuahnaa inhnamhnawiha thiam loh chantir tawh, mi 49 zinga mi 38-te chu nimin khan thi turin an chungthu a relsak.

Kum 2008-a Ahmedabad-a bomb puak vang hian mi 56 an thi a ni.

Special court judge AR Patel chuan mi 38-te thi tura an chungthu relsakin Rs 25,000 chawi ṭheuh turin a ti a, mi dang 11-te pawh dam chhung tang tur leh Rs 25,000 chawi turin a ti bawk.

Kumin February 8 khan Gujarat court chuan pawikhawihna thlenga inhnamhnawiha puh zinga mi 49-te hi thiam loh a chantir a, midang 28-te erawh thiam a chantir thung. Kum 13 chuang zet he thubuai hi ngaihtuah a nih hnuin nikum September thla khan an ngaihtuah fel thei chauh a ni.

Kum 2008, July 26 khan Ahmedabad khawpui chhungah minute 70 chhungin bomb ṭum 21 zet tihpuah a ni. Sorkar hospital, Ahmedabad Municipal Corporation erawh LG Hospital-ahte bomb hi a puak tel a ni. Mi 56 an thih bakah mi dang 200 chuang an hliam bawk. Police-te chuan he pawikhawihna hi Indian Mujahideen (IM) nena inzawmte thiltih niin an puh. IM hian kum 2002-a Godhra, Gurajat-a Hindu leh Muslim intualvuakna thleng chungchanga phuba lakna atana ti niin an puh a ni.