India-ah Covid-19 hri kai thar 25,920 an awm

India ramah Ningani khan Covid-19 hri kai thar mi 25,920 awmin, thihpui 492 an awm. A hma ni aiin hri kai hmuhchhuah thar hi 16% in a tlahniam a ni.

Ningani thleng khan ram pumah hripui vanga thi mi 5,10,905 an tling tawh tih Ministry of Health-in nimin (February 18, 2022)-a data a tihchhuahah a tarlang.

Hri kai mek, active case chu mi 2,92,092 an awm a, hei hi hri kai hmuhchhuah tawh, mi 4,27,80,235 aṭangin 0.68% an ni.

Ningani khan hri kai enkawl dam 66,254 awm belh lehin, hri kai dam tawh hi mi 4,19,77,238 an awm tawh.

Ni khata hri kai hmuhchhuah, daily positivity rate chu 2.07% ah a tla thla tawh. Kar khata hmuhchhuah, weekly positivity rate pawh 2.76% a ni tawh tih ministry chuan a tarlang. Ningani khan sample 12,54,893 test a ni.

Ram pumah Covid-19 vaccine pek chhuah hna pawh ngawrh taka kalpui chhunzawm zel a ni a, Ningani thleng khan vaccine hi dose vaibelchhe 174.64 pek chhuah a ni tawh.

John Hopkins University-in a tarlan danin, khawvel pumah Covid-19 hri kai hmuhchhuah tawh hi maktaduai 419.4 an tling tawh a, an zinga maktaduai 5.86-in an thihpui tawh a ni. Vaccine hi dose tluklehdingawn 10.30 chuang pek chhuah a ni tawh bawk. State leh UT-ten Covid vaccine hman loh an la kawl hi dose vaibelchhe 11.41 chuang a la tling a ni.

US chu Covid-19 hri kai leh thihpui tamna ber ram a la ni chhunzawm zel. US-ah hian hri kai 7,82,74,553 awm tawhin, thihpui 9,31,504 an tawh bawk a ni. US dawtah hri kai tamna chu India a ni. Mahse India aia hri tlem zawkna, Brazil chu Covid-19 thihpui tam ram pahnihna a ni thung. Brazil-ah hian hri kai 2,79,40,119 awmin, an zinga 6,42,156 in an thihpui tawh a ni.