EC-in inthlan neih tur chungchanga kaihhruaina tichhuak

Election Commission chuan kumina state assembly inthlan neihna tur, Chhattisgarh, Madhya Pradesh, Rajas-than, Mizoram leh Telangana-a inthlan kaihhnawih news tihchhuah dan tur kaihhruaina a tichhuak.

EC chuan inthlan zawh fel hma darkar 48 chhung chu news medium hrang hranga inthlan kaihhnawih thil tihchhuah a khap. Television, radio channel leh cable network-te chu inthlan result nghawng thei tur candidate chungchang tichhuak lo turin a ti.

"Inthlan neih lai hian TV channel-ten panel discussion/debate, news leh current affairs programme an tihchhuahah Representional of the People Act, 1951-a Section 126 bawhchhiatna a awm fo ṭhin. Section 126 hian constituency-a vote thlak tawp hun tur aṭanga darkar 48 hma lam chuan news medium hrang hrangah inthlan kaihhnawih thil tihchhuah a khap a ni", a ti. Section 126 palzutte chu kum hnih thleng lunin tantir leh pawisa chawitir theih an ni.

EC chuan vote thlak tawp hun aṭanga darkar chanve hmalamah exit poll buatsaih emaw, result rindan lo thehdarh emaw a khap bawk.

Political party hrang hrangte chuan social media kaltlanga campaign an neihnaah, mipute privacy tibuai zawngin an kalpui tur a ni lo, tiin EC chuan a sawi bawk. Political party leh candidate-te chu zan dar 10 leh zing dar 6 inakrah mi phone lo tur te, SMS leh WhatsApp message thawn chhuak lo turin a ti bawk a ni. EC chuan mitinte privacy chu zahsak tur a ni tiin, an nunphung tibuai zawnga thiltih tur a ni lo, a ti. Door-to-door campaign leh loudspeaker hman pawh zan dar 10 leh zing dar 6 inkarah khap a ni bawk a ni.