Dassault-in Reliance thawhpui chungchang sawifiah

France media report-in aviation company, Dassault Aviation chuan India sorkar nena Rafale deal siamna tura contract liantham a hmuh theihna turin Anil Ambani-a company, Reliance Defence a thawhpui a ngai nia an tarlan chungchang chhangin, Reliance Defence chu an duhthu ngeia an thawhpui niin Dassault chuan a sawi.

Mediapart-in report a tihchhuahah, Dassault top official Loik Segalen chuan nikuma staff-te hnena thu a sawinaah, Reliance Defence nena thawhdun chu Dassault Aviation tan chuan India sorkar hnen aṭanga Rafale contract hmuh theihna tura thil tih ngai a ni tih a sawichhuak niin a tarlang.

Sorkar laipuiin France company hnen aṭanga Rafale fighter jet 36, dollar tluklehdingawn 8.7 man lei tuma inremna a siampui hian sawizui leh sawisel a hlawh hle a, inremna siam a nih dan kimchang te puangzar turin eptute chuan an phut.

Mediapart-in Dassault official thusawi a tihchhuah leh nen hian he inremna siam a nih danah thil dik lo a awm tih a tichiang ta niin an sawi.

Rafale fighter leina tur man nasa taka tihsan a ni leh, ramchhunga Dassault thawhpui atana thlawhtheihna siam lama hnuhma nei ṭha tak, Hindustan Aeronautics thlag lo a, billionaire Anil Ambani-a company thlan a nih daih dante chuan sawizui a hlawh hle. Mediapart-in a tarlan danin, India sorkar chuan dollar maktaduai tel contract a hmuh theihna tura India rama offset partner atana Reliance thlang tur hian Dassault hi a nawr niin a sawi a ni.

Dassualt chuan thu-chhuah siamin, India rama a company thawhpui tur thlan chungchangah sorkar laipui a inrawlh lo niin a sawi thung. Contract hlutna 50% chu tualchhung economy in a hlawkpuina tura invest an duh a, hemi atan hian private Indian firm thawhpui chu a tum zawk niin a sawi.