Shiv Sena-ten sa zawrhna dawr khar luihsak

Shiv Sena leh an thurualpui pawl dangte chuan Navaratri festival hman chhunga sa dawrte inkhar tura tiin, Guragon-ah sa dawr 400 chuang an khar luihsak.

Siva Sena Gurgaon unit hotu, Gautam SAini chuan Hindu pawl hrang hranga member 300 vel chu Lord Shiva temple-a an inhmuhkhawm hnuin, hmun hrang hrangah sa dawrte kharsak tura an kal thu a sawi. Tualchhung mite chuan kum 2014-a central leh Haryana-a BJP a sorkar hnuah Navarati festival chhung hian sa zawrhna dawrte chu khar luihtir an ni ziah tih sawiin, kuminah pawh sa dawr tam zawk chu Hindu pawlte hlauh avangin an lo inkhar lawk niin an sawi.

DCP(crime) Sumit Kuhar chuan sa dawr khar luihsak nia sawi hi an enfiah mek thu sawiin, tumahin mahni thuin dan an lekkawh thei lo tih a sawi. Navaratri festival chhung hian sa dawr khar luihsak an remti lo tih sawiin, mahni duhthua dawr kharte erawh an bawhzui thei lo tih a sawi. Police-ten an chhuizui theihna turin dawr khar luihsak nia sawite chu complaint thehlut turin a ti bawk.