Hijab row : Police-ten college zirlai 20 lakah FIR ziak lut

Karnataka state-a college-a hijab khap chungchanga buaina kal zelah, Karnataka High Court-in classroom chhunga sakhaw kaihhnawih thuam inbel khapna thupek a siam bawhchhia, Tumakuru college zirlai 20-te lakah police-ten FIR an ziak lut.

Karnataka home minister Araga Jnanendra chuan High Court interim order bawhchhiate laka action la zel turin police-a hrilh. Bengaluru aṭanga km 70 vela la, Tumakuru-a Empress College-ah hian Zirtawpni khan zirlaite chuan hijab nena class kal phalsak phutin lungawi lohna an lantir a ni. Kodagu-a Field Marshal KM Cariappa College-ah pawh Muslim mipate chuan Muslim hmeichhiate hijab inbel phalsak an nih hma chuan class an kal dawn lo tih an sawi bawk. Hijab chungchanga buaina hi state chhung district hrang hrangah a darh tawh a ni.

Hetih lai hian Mysuru khawpuia private college pakhat chuan Muslim zirlai hmeichhiaten hijab nena class an kal ve theihna turin kar liam ta Zirtawpni khan uniform rule a siam chu a titawp thung.

Eptu hruaitu Siddaramaiah chuan chief minister Basavaraj Bommai hnenah hijab khapna siam hi minority institution-ah chuan hlip turin a ngen.