Covid kai thar 20,000 hnuai lamah tla thla hri kai mek tlakhniam belh zel

India ramah ni 51 hnuah Covid-19 hri kai thar mi 20,000 hnuai lamah tla thlain, hri kai mek pawh mi 2,24,187 ah an tla thla tih nimin zinga Union Health Ministry data chuan a tarlang.

Inrinni liam ta khan ram pumah hri kai thar mi 19,968 awmin, thihpui 673 awm belh leh a, hripui thihpui tawh hi mi 5,11,903 an ni tawh a ni. Nikhata Covid-19 kai thar chu ni 14 chhung a zawnin nuai khat hnuai lamah a awm tawh a ni.

Hri kai tawh aṭanga chhutin hri kai mek zat chu 0.52% a ni a, Covid-19 enkawl dam, recovery rate chu 98.28% ah a kai chho leh tawh bawk. Hri kai mek, active case chu darkar 24 chhungin mi 29,552 in an tlahniam hman.

Rampum huapin nitina hri kai thar zat, daily positivity rate chu 1.68% ni mekin, kartina hri kai zat, weekly positivity rate chu 2.27% a ni mek tih ministry chuan a puang.

India ramah August 7, 2020 khan hri kai nuai 20 chuang awmin, August 23-ah nuai 30, September 5-ah nuai 40 leh September 16 khan nuai 50 hmuhchhuah an ni. September 28 khan nuai 60 kai chho lehin, October 11-ah nuai 70, October 29-ah nuai 80, November 20-ah nuai 90 leh December 19 khan vaibelchhe khat an tling chho leh a ni. India chuan May 4, 2021 khan mellung duhawm loh tak siam chho lehin, hri kai vaibelchhe hnih leh June 23 khan vaibelchhe thum an tling leh a ni.

Ramchhunga vaccine semchhuah runpui kaltlangin dose vaibelchhe 175.53 pekchhuah a ni tawh. Puitling zingah 80% chuangin vaccine dose kimin an la tawh a ni, tiin Mandaviya chuan twitter kaltlangin a sawi.

Official data tarlan danin, ramchhunga 96.5% velin Covid-19 vaccine dose khatna an la tawh a, tleirawl kum 15-18 inkar zinga vaibelchhe hnih chuangte chuan Covid- vaccine dose kimin an la tawh bawk tih data chuan a tarlang.