Pakistan-in surgical strike vawi 10 neihah India a vau

Pakistan chuan an ram chhungah India-in surgical strike vawi khat pawh a nei leh a nih chuan, India rama surgical strike vawi 10 neih letah a vau.

Pakistan Inter Services Public Relations thupuangtu Major General Asif Ghafoor chuan London-a media mite a kawmnaah he thu hi a sawi a ni. Ghafoor hian London-ah hian Pakistan Army Chief General Qamar Javed Bajwa a ṭawiawm a ni.

Ghafoor chuan, "India-in paksitan ramah surgical strike a nei leh a nih chuan vawi 10-in kan chhang let ang", a ti. Pakistan Army chu US dollar tluklehdingawn 50 man China Pakistan Economic Corridor (CPEC) enkawltu a nih thu sawiin, he mega project hian Pakistan ram economy pawh a tihchak phah dawn hle tih a sawi bawk.

Pakistan Army chuan an rama democracy tihchak a duh a, July thlaa inthlanpui an neih pawh khan an ram chanchina inthlanpui an neih tawha langtlang ber a nih thu a sawi. "Vote tihchingpen awm nia sawi a, finfiahna neite chuan an rawn complaint thei reng a ni", a ti. Inthlan kaihhnawihah media mite hrekna a awm nia sawi pawh thu dik lo a nih thu sawiin, zalen taka thil kalpui vek a ni, a ti.