Rajasthan-ah Zika virus vei 55 awm tling tawh

Rajasthan health dep-artment official chuan Inrinni khan Jaipur-ah Zika virus vei hmuhbelh an nih thu sawiin, he hri vei awm zat hi mi 55 an tling tawh tih a sawi.

Additional chief secretary (medical and health) Veenu Gupta hoa review meeting neih hnuah, Zika virus vei awm zat hi department chuan a tichhuak a ni. Official chuan Zika hri veite hi enkawl mek niin, an zinga 38 chu an dinhmun a ṭha tawh hle niin a tarlang. He hri vei enkawl mek zinga 11 chu naupai lai an ni.

Union health ministry official-te chuan National Institute of Malaria Research (NIMR) team chuan Jaipur hmun hrang hrang aṭangin thosi sample an la thar leh tih an sawi. Sindih Camp leh Shahstri Nagar bial aṭanga thosi sample an lakte aṭang chuan Zika virus an pai tih hmuhchhuah a ni.

Rajasthan-a Zika virus an hmuh hmasak chu September 22 khan kum 85 mi an test aṭangin a ni a, ani hi state pawn lamah pawh zinchhuak lo a ni. He hri hmuh a nih hnu hian Shastri Nagar area-ah chuan hri darh zel tur venna atan hian thosi leh thosi tuite tihbo tura hmalak zui nghal a ni. Health department chuan naupai laite chu Shastri Nagar area tlawh lo turin an ngen bawk.

Thil awmdan thlithlai reng turin National Centre for Disease Control-ah control room siam nghal a ni. Jaipur-a duty tur monitoring team pawh 50 aṭangin 170-ah tipun a ni. Zika hri veite enkawlna tur hian Hir Bagh Training Centre-ah special isolation ward siam a ni tawh bawk.

Rajasthan sorkar chuan Zika virus chungchang leh a inven dan tura mipuite hrilhhriatna tur a buatsaih mek. He hri hi thosi chi khat aedes aegypti mosquito aṭanga kai theih niin, a veite chuan khawsik sang, vun thak, mit na/mit sen, tha leh ruh chuktuah na te an nei ṭhin. Naupai laiten an vei chuan a naupaiah ṭhat lohna, a taksa phu loa a lu tetna a thlen phah thei bakah, nauchhiat a hlauhawm bawk.