PM-te puala museum siamna tur lungphum phum dawn

Prime minister-te puala museum siamna tur lungphum chu vawiin hian New Delh-a Teen Murti Estate-ah union minister-ten an phum dawn. Museum siam tum hi Congress party chuan a duh lo a, prime minsiter hlui Manmohan Singh pawhin a duhlotu zingah a te.

India Prime Minister hmasa ber, Jawaharlal Nehru-a official residence, Teen Murti Estate-ah Culture Minister Mahesh Sharma leh Minister of State for Housing and Urban Affairs Hardeep Singh-ten lungphum hi an phum dawn a, Culture Ministry chuan he huna tel tur hian media te a sawm bawk.

PM hlui Manmohan Singh chuan thla hmasa khan amah thlaktu, PM Narendra Modi hnenah sorkar laipuiin Nehru Memorial Musuem and Library (NMML) nihphung thlak danglam a tum dan chu a duh loh thu ziakin alo hrilh tawh a ni. Modi chu NMML awmna Teen Murti Complex chu khawih buai lo tura ngenin, tuna museum awm mek chu ram history leh heritage zahna lantirna a ni, a ti.

Manmohan Singh chuan, "Atal Bihari Vajpayee-a kum ruk chhung prime minister a nih lai khan NMML leh Teen Murti Complex khawih danglam tumna hi a awm lo a, mahse tuna sorkar laipuiin a khawih danglam tum zingah a telh hi a pawi hle a ni", a ti.

NMML society member, Congress hruaitu hlun Mallikarjun leh Jairam Ramesh bakah historian te pawhin sorkar hmalakna hi an dodal a, August thla khan he thil hi kaltlang pui lo tura ngenin Home Minister Rajnah Singh pawh an lo be tawh bawk.