PM Modi-an oil leh gas company hotute meeting neihpui

Ramchhungah nitin deuhthawin petrol leh diesel man a to chho zel a, hei vang hian Prime minister Narendra Modi chuan nimin khan oil leh gas company 40 hotute meeting a neihpui. Meeting-ah hian Petroleum Minister Dharmendra Pradhan pawh a tel.

Nimina PM hoa meeting neihnaa tel zingah hian Reliance Industries hotu Mukesh Ambani, Hindustan Petroleum hotu MK Surana, Indian Oil aṭangin Sajiv Singh leh ONGC aiawhin Shashi Shankar te pawh an tel. Meeting hi Niti Aayog kaihhruaina hnuaiah neih a ni.

Meeting-ah hian US-in Iran a hrekin nghawng a neih dan te, oil man sangin ramchhunga nghawng a neih dante chu an ngaihtuah ber a ni. Hei bakah hian oil leh gas zawnchhuah leh siamchhuana kawnga investment tih thar dan turte pawh an sawiho bawk.

Kum 2017 October thla khan oil leh gas company hotute nen hian meeting neih lo ni tawh bawk a, hemi ṭum hian ram chhunga oil siamchhuak tur leh gas field-a thawk tura foregin leh private company-te phalna pek chungchangah rawtna te siam a ni. Mahse he rawtna hi ONGC lamin a dodal nasat avangin kaltlangpui theih a ni ta lo a ni.

Sorkarin fuel-a VAT a lak ṭhin a tihniam chungin petrol leh diesel man hi a la pun belh zel a, Pathianni khan Delhi-ah petrol litre khat Rs 82.72 niin Mumbai-ah chuan Rs 88.18 a kaichho tawh a ni.