Cyclone Titli tleh vanga thi 24 an tling

Odisha-a Cyclone Titli tleh vanga thi chu Pathianni thleng khan mi 24 an tling tawh a, hetihlai hian cyclone tleh ruala ruahsur nasa vanga tuilian erawh chuan ziaawm lam a pan tawh a ni.

Pathianni khan Gajapati district-ah leiminin in a hnawl hnuaiah ruang pahnih hmuh belh leh an ni a, heng mite nen hian cyclone tleh leh ruahsur nasain chhiatna a thlena thi chu mi 24 an tling tawh a ni. Gajapati district-a Barghar area-ah hian kar kalta Zirtawpni khan leimin vangin mi 15 an thi a ni. Leimin bakah ruahsur nasa vanga tuilianah mi pathum an thi a, Ganjam leh Khandamal district-ah mi pali leh pahnih an thi bawk.

Special Relief Commissioner (SRC) B P Sethi chuan tuilianin ziaawm lam a pan tak vangin harsatna tawkte chhawmdawl hna thawh pawh chak zawka kalpui theih a ni ta niin a sawi. Thli leh ruahsur tuar nasa ber, Ganjam leh Gajapati district-ah pawh thingkung leh electric ban tluin kawng a hnawhte thenfai mek a ni a, electric supply pawh hmun tam zawkah an nei leh tawh tih a sawi.

SRC chuan thlipui tleh hian thlai chin tam tak a lenchhia niin a sawi a, Sethi chuan thlipui tuar loneitute puih dan tur pawh ruahmanna siam thuai a ni ang, a ti.