Jaipur-ah Zika virus kai hmuhbelh zel

Rajasthan-a Jaipur-ah Thawhṭanni khan Zika virus vei 12 hmuhbelh a ni a, heng mite nen hian Zika hri vei finfiah tawh hi mi 72 an tling tawh.

Rajasthan health department chuan hri vei hmuh tharte nen hian ni 25 chhungin mi 72 in he hri hi an vei tih hriat a ni tih a sawi. Zika virus hmuhna hi Jaipur-a Shastri Nagar, Station Road area leh Vidhyadhar Nagar te a ni.

Health department additional chief secretary Veenu Gupta chuan hri vei 72 zingah 60 chu an dam ṭha tawh tih a sawi a, mi 12 te chu enkawl mek an ni, a ti. Khawpui chhunga chengte chu fimkhur tura hriattir an ni tih a sawi bawk.

Veenu Gupta-i chuan health department-a thawk 280 te chuan door-to-door survey an neih thu sawiin, in 96,000 an tlawh tawh tih a sawi. Hei bakah hian tui dahna bawm maktaduai 2.44 chu enfiah niin, heng zinga bawm 55,000 ah hian thosi tui hmuh a ni a, hengte hi tihfai vek an ni, a ti. Door-to-door survey neihah hian damlo khawsik bakah naupai laite chu enfiahin, an sample te lak a ni bawk.

Gupta chuan thosi pian theihna tur tui tling awm te tibo a, tui dahna hmunte a chhin neih tir vek tura an ngenna erawh mipuite chuan an la la thutuk lo hle niin a sawi a, hetianga tite hi hrem hreh hle mah se an tihngei a ngai tih a sawi. Mipuite pawisa an chawitir aṭang hian Rs 44,000 an hmu tawh niin a sawi bawk.

Zika virus leng mek avang chuan mipuite chu hlau leh chiai lo turin a chah nghal a, hemi rual hian hri a lenna bialah chuan a bikin naupai laite chu kal lo turin a chah.

Rajasthan-a Zika virus vei hmuhbelh an nih tak zel avang hian union health ministry chuan state hrang hrangte chu fimkhur tura chahin, thosi pian theihna hmunte enfiah ṭha a, hri leng darh tur venga tura hma la turin a ti. Ministry of health and family welfare additional secretary (health) chuan state hrang hrang aiawhte chu video conferencing hmangin meeting a neihpui a, Zika hri leng darh tur venna atana National Vector Borne Disease Control Programme in kaihhruaina a siamte chu zawm turin a ti.