Defence lam thuam chakna turin agency pathum din thar dawn

Sorkar laipui chuan defence lam thuam chakna turin agency pathum- Defence Cyber Agency, Defence Space Agency leh Special Operation Division a siam thar dawn.

Heng agency din thar turte hi tri-service agency niin an thawkho dawn a, Chief of Staff Committee chairman kaihhruaina hnuaiah an awm ang. Kum 2012 khan Chief of Staff Committee chuan kawng hrang hranga defence lam tibuai thei zawnga beihna awm ṭhin do letna tur hian joint command pathum - cyber, space leh special operation din an lo rawt tawh a ni.

Space agency hi Indian Space Research Organisation (ISRO) leh Defence Research and Development Organisation (DRDO) te nen an thawkho thei dawn a, Special Operation Division-ah hian Indian Army, Navy leh Indian Air Force aṭangin commando an tel ang a, training te an neiho dawn a ni. Army, Navy leh Indian Air Force te hian special force - Para-Coomandos, Marine Commandos leh Garud Commandos te an nei ṭheuh a, mahse hengte hi a hran ṭheuhin an training ṭhin. Special Forces Agency-ah hian Para-Commando leh Marine Commando te an awm dawn a ni.