UP cabinet-in Allahabad hming thlakna tur pawm

Uttar Pradesh cabinet chuan Allahabad khawpui hming Prayagraj tia thlak rawtna chu nimin khan a pawm. Department leh institution hrang hrangah Allahabad hming thlakna tur thupek hi pekchhuah thuai an ni dawn tih Cabinet chuan a sawi.

Chief Minister Yogi Adityanath chuan kar kalta Inrinni khan cabinet member-ten an pawm tlan theih chuan Allahabad khaw hming hi thlak a ni dawn tih a lo sawilang tawh a ni. BJP hruaitu Siddarth Nath Singh chuan thla rei vak lo liamtaah hian Allahabad hming thlak hi a lo rawt chhuak tawh a ni. CM chuan khaw hming thlak hi mipui tam tak duhdan a ni tih a sawi bawk.

Nakkum January 15-a Allahabad-a Kumbb Mela neih ṭan hma ngeiin khaw hming thlakna hi tihfel tum a ni a, Kumb Mela puala banner siam ṭhenkhatah pawh Allahabad tih aiah Prayagraj tia tarlan a ni tawh bawk a ni.