EC-in inthlan khuahkhirhna siam thlahdul belh ; Party-te star campaigner neih theih zat tipung

Election Commission of India (ECI) chuan assembly inthlan neihna tur state pangaa inthlan kaihhnawih khuahkhirhna a siamte chu a thlahdul belh zel.

Ram chhunga Covid-19 hri leng vanga kaihhruaina siamte thlahdul chhoh a nih avangin, Pathianni khan ECI chuan state pangaa khuahkhirhna a siamte pawh a thlahdul ṭhen ve leh. Political party-te tana star campaigner neih theih zat a bituk pawh tipungin, recognised national leh state party-te star campaigner neih phal zat chu 30 aṭangin 40 leh, a bak recognised party dangte tan 15 aṭangin 20-ah a tihpun sak bawk.

Poll panel hian political party-te chu February 23 tlai dar 5 thleng an star campaigner atana an dah belh turte hming hi ECI emaw, chief electoral officer hnenah emaw thehlut turin a hriattir nghal bawk a ni. Star campaigner atana dah belhte hi inthlan thawh ngana aṭangin an campaign phalsak a ni ang. Inthlan thawh lina atana campaign theih hun hi nimin khan a tawp. Star campaigner-te sum senso hi a campaign sak candidate-ten ni loin party-in an tumsak ṭhin.

Ram chhungah Covid-19 hri lengin ziaawm lam pan a, hri kai thar an tlakhniam zel avangin sorkar chuan hri leng vanga khuahkhirhna a siamte a thlahdul mek a ni. Hei vang hian hri darh hlauhthawn avanga inthlanna neihna tur state-a khuahkhirhna hrang hrang siamte pawh ECI chuan a thlahdul ve zel a ni.