Kum 5 tang tur leh Rs nuai 60 chawi turin Lalu Yadav hrem

Ran chaw man tihchingpen thubuaia thiam loh chantir tawh, Bihar chief minister hlui leh Rashtriya Janata Dal (RJD) hruaitu, Lalu Prasad Yadav chu kum nga jail-a tang tur leh cheng nuai 60 chawi tura hrem a ni.

Jharkhand-a Central Bureau of Investigation (CBI) special court chuan Lalu Yadav hi kar liam ta khan kum 1995-1996 inkara central aṭanga ran chaw man tura an dawn zinga cheng vaibelchhe 139.5, dik lo taka Doranda treasury aṭanga lakchhuahnaa inhnamhnawih zinga puhnaah thiam loh a lo chantir tawh a ni. Hei hi ran chaw man tihchingpen thubuai siamsak zinga thiam loh chantir a nih pangana a ni.

Lalu Yadav hi bail-in a chhuak mek a, mahse a damsam loh avangin nimina court hearing neihnaah hian a hmunah a kal thei lo a, video conferencing hmangin a lo ngaithla thung.

Thiam loh chantir a nih tawhna thubuai dang pali-ah Lalu Yadav hi kum 14 tang tura hrem a ni tawh bawk. Mahse heng case paliah hian bail-in a chhuak mek.

Bihar leh Jharkhand ṭhendarh hma, kum 1990 chhoa Lalu Yadav chief minister a nih lai khan, sorkar laipui aṭanga Bihar-in ranchaw man tur a sum dawn, cheng vaibelchhe 950 chu tihchingpen a ni. CBI chuan ran chaw tihchingpen kaihhnawihah hian thubuai 64 an ziaklut a, heng zinga parukah hian Lalu hi a tel a ni. A thubuai zinga panga hi Jharkhand-ah ngaihtuah niin, pakhat hi Patna-ah ngaihtuah a ni thung. Patna court-ah a thubuai hi tihkhawtlai a la ni.