Indian ṭawng chawilar nan rampumah social media campaign nei dawn
February 21-a hman ṭhin, International Mother Language Day pualin union education ministry-in nikum lama a lo din tawh, High Powered Committee for the Promotion of Indian Languages chuan National Education Policy (NEP) 2020 in a lo tum angin, ram pumah pianpui ṭawng chawilarna turin social media campaign a nei dawn.
Indian tawngte chawi lar a, huamzau zawka hma an sawn zel theihna tura hmalaknaah hian Central Institute of Classical Tamil, Chennai, and Central Institute of Indian Languages, Mysore-te pawh an tel dawn tih committee chair Chamu Krishna Shahstry chuan a sawi.
UNESCO-in International Mother Language Day tia a vuah chu Mother Tongue Day atana hman uar zawk a duh thu sawiin, Padma Shri awardee Shastry chuan, "Kan tum chu ‘matra bhasha diwas’ (Mother Tongue Day)-a ni. Ramdang ṭawng kan hman chuan Indian ṭawng pawimawhna kan hloh a ni." a ti. "India hi ramdang zawngte aiin a danglam a ni. Ram tam zawk hi chu ṭawng chi khat chiah hmannate an ni; kan ram erawh ṭawng hrang hrang hmanna a ni," a ti.
He ni pual hian committee chuan poster-te siamin, Aurobindo, Rabindranath Tagore, Mahatma Gandhi, APJ Abdul Kalam, leh NEP lam ṭawng lama mi bikte ṭawngkam (quotes) an tarchhuak a ni. Heng quote-te hi scheduled ṭawng 22-ah lehlin chhawn leh a ni dawn tih Shastry chuan a sawi bawk.
"Social media campaign kan hman chhan chu kan pianpui ṭawng pawimawh zia tarlan kan duh vang a ni. Naupang chu a pianpui ṭawng ni loa English ṭawng kan zirtir daih chuan ama pianpui ṭawng a thiam ṭha dawn lo. Tupawhin hmasawn zel kan duh chuan kan pianpui ṭawng thiam hi a pawimawh. He campaign kaltlang hian NEP 2020 pawh tarlan tel kan tum a ni," a ti.
NEP 2020 hian India rama ṭawngte chawisan kawnga hma la turte, ṭawng humhalh a, India rama ṭawng awm zawng zawngte chawilar turin hma an la dawn a ni. India rama zirna in zawng zawngte chuan ṭawng hlui(classical), hnam tlem zawk(minority), tribal leh a bo mai hlauthawnawm tawh ṭawngte chu chawilar zel an duh tih Shastry chuan a sawi bawk.