Srinagar-ah firfiak pathum kaphlum

Jammu and Kashmir-a Srinagar-ah nimin khan police-ten firfiak pathum an kaphlum a, an zingah hian Lashkar-e-Taiba (LeT) commander pawh a tel. Firfiakte nena inbeihnaah hian police pakhat a thi tel bawk.

Central Reserve Police Force (CRPF) puihnain police-te chuan nimin khan Srinagar khaw chuanhnuai lam, Fateh Kadal-ah firfiakte an awm tih thu an dawn avangin an dap a, firfiakte nen hian an inkap zui a ni. Security force leh firfiakte inkah vang hian khawpui chhunga school te khar niin, mobile internet pawh tihtawp nghal a ni bawk.

Inspector General of Police (IGP) Kashmir Swayam Prakash Pani chuan zing hma takah security force-te hian an thu dawn bawhzuiin beihpui an thlak tih a sawi a, firfiak kahhlum zinga pakhat chu man tuma zawn mek, LeT commander Mehrauddin Bangroo a nih thu a sawi. Firfiak dang pakhat chu an tawmna in neitu fapa a nih thu a sawi.

IGP chuan Bangroo chu Srinagar-a pawikhawihna thleng eng emaw zatah a inhnamhnawih thu sawiin, khawpui chhunga Laskhar pawl khaidingtu ber a nih thu a sawi. Bangroo an dahbo thei chu security force tana hlawhtlinna pawimawh tak a nih thu a sawi bawk.