Kashmir zirlaiten 'no criminal report' certificate neih ngai

Punjab Police-te chuan an state chhung zirna in zawng zawngah Jammu and Kashmir state aṭang zirlai kalte chu admission an tihsak hmain 'no criminal record' certificate thehluh tir zel turin an hriattir.

Jammu and Kashmir aṭanga kal zirlaite chuan Punjab-a lehkha an zir dawn chuan, an state-a pawikawihna thlengah an inhnamhnawih ve lo a ni tih lantirna certificate hi an neih zel a ngai tawh dawn a ni. He certifciate hi Punjab Police-ten an enfiah leh phawt ang a, chumi hnuah admission pek theih an ni chauh dawn a ni.

Police-ten he thutlukna an siamna chhan hi October 10-a Jalandhar khaw daia Kashmir zirlai pathum, assault rifle leh bomb lam chi kawlte man an nih vang a ni. Punjab DGP Suresh Arora chuan zirlai pathum mante hi firfiak pawl, Ansar Ghazwat-ul-Hind (AGH) thlawptute an ni tih a sawi.

Punjab-ah hian J&K aṭanga kal zirlai 9,000 vel an awm mek a, kumtinin zirlai kal zat hi an pun belh a ni. Police-te chuan Kashmir zirlai awm mekte chanchin kimchang hi an lakhawm mek bawk.