India ṭhendarh hna a tihtawp chuan PM ka dodal zel lo ang : Rahul Gandhi

Congress party president Rahul Gandhi chuan Pirme Minister Narendra Modi chuan India mipuite ṭhen-darh zawnga a thiltihte a tawpsan a, mirethei te ngaihsaka a ṭanpui chuan PM chu a dodal zui zel dawn loh thu a sawi.

Assembly inthlan neihna tur, Madhya Pradesh-a Congress party tana a campaign-a Thawhlehnia public meeting a neihnaah he thil hi sawiin, Rahul Gandhi chuan "Mi ṭhenkhat chuan Rahul Gandhi hian Narendra Modi hi a dodal ve hrim hrim a ni, an ti. Mahse pawngpaw dodal ngawt ka ni lo a, a chhan ṭha tak a awm a ni" tiin, Narendra Modi chuan mi rethei leh harsa zawkte ngaihtuah a, ṭanpui hna a thawh hun hunah a dodal tawh dawn lo tih a sawi. Ram ṭhendarh awnga a thiltih te a tawpsan hunah, Modi a dodalna pawh a tihtawp ve nghal dawn tih a sawi.

PM Modi chu mi hausa mi tlemte tan chauha thawkah puhin Congress hruaitu chuan, "Modi hian rorelna dik, loneitute loan ba ngaihdam, kuthnathawktute thlawpna leh ram mipuiten an duhdan angte a sawi hma chuan, Rahul Gandhi hian a dodal zel dawn a, a chhan chu mipuite hi ram hmasawnna atana thawktute an ni tih ka ring nghet tlat a ni", a ti. Independence Day lawmnaa thu a sawiah PM Modi chuan India ram a din theihna tura nasa taka thawktute zah lo takin thu a sawi a ni, a ti.