ED-in Muzaffarpur shelter home lakah thubuai ziak lut

Enforcement Direc-torate chuan nimin khan Bihar-a Muzaffarpur shelter home lakah dan loa a sum hmuhna thupa puhna thubuai a ziaklut. Muzaffarupur shelter home-a awm hmeichhe naupang 34 ten pawngsual an tawk nia sawi a nih avangin he home hi kharsak a lo ni tawh bawk.

Agency chuan shelter home enkawltu, Sewa SAnkalp Evam Vikas Samiti-in ṭanpuina sum a dawn dante chu chhuichian a ni dawn tih a sawi. Local agency leh Central Bureau of Investigation aṭanga thu an dawn bawhzuiin, ED hian Prevention of Money Laundering Act hnuaiah shelter home hi a chhui zui a ni.

Home-a enkawl hmeichhe naupangte pawngsual nia sawi a nih vang hian May 31 khan home enkawltu NGO neitu, Brajesh Thakur leh mi dang 10 lakah FIR thehluh a lo ni tawh a, hemi chungchang chhui hna hi tualchhung police-te kut aṭangin CBI in a la tawh bawk. Medical examination neihpui an nih hnuah home-a awm mi 42 zinga 34 te chu pawngsual an ni tih finfiah a ni tawh bawk.

Bihar sorkar chuan Muzaffarpur shelter home hi blacklist-ah telhin, he home-a hmeichhe naupang enkawlte chu Patna leh Madhubani-a home dangah sawnchhuah an ni tawh a ni. Home enkawltute bakah Thakurp pawh man a ni tawh bawk a ni.