Pakistan PM Imran Khan-a'n PM Modi nen TV debate neih a duh

Pakistan prime minister Imran Khan chuan prime minister Narendra Modi chu TV debate neihpui a duh thu sawiin, hei hi ram pahnihten inhriatthiam lohna hrang hrangte chinfelna atan a ṭangkai dawn niin a sawi.

India leh Pakistan hi kum 75 liam taa independence an hmuh aṭangin boruak chhe tak an neih chho reng a, ṭum thum an indo tawh bawk a ni.

Russia Today-in a kawmnaah Pakistan PM hian Narendra Modi nen TV-a debate neih a chak thu hi a sawi a ni. Debate hmanga ram pahnihte inkar boruak ṭha lo a siamṭha thei a nih chuan Indian subcontinent-a cheng mi tluklehdingawn chuangin an chhawr thei dawn a ni, a ti.

PM Imran Khan thusawi chungchanga an chhanna hi ministry of external affairs lam zawh ni mah se anni chuan engmah an la sawi lo.

Imran Khan chuan ram pahnihte inkar boruak ṭha lo avangin India nena an insumdawn tawnna pawh a tlem tawh hle tih a sawi a, Pakistan sorkar chuan ram dangte chu insumdawnna lama inzawmna ṭha tak neihpui vek a duh a ni, a ti.

Khan-a'n interview a neih hma hian Pakistan top commerical official Razak Dawood pawhin chanchinbu mite a kawmnaah India nena insumdawnna nghet neih a thlawp thu a sawi a, hei hi ram pahnihten an hlawkpui ve ve dawn a ni tiin a lo sawi tawh bawk.

Pakistan Prime Minister hi Russia-ah a zin mek a, Russia president Vladimir Putin a hmu dawn a ni. Khan hi kum 20 chuang hnuah Pakistan hruaitu lu zinga Russia ram tlawh hmasa ber a ni.