Ukraine-a India mite hruai turin Air India-in Boeing 787 thlawhtheihna tir

Indona thlen mai theih dinhmuna ding mek, Ukraine rama India mi awmte hruai hawna turin nimin khan Air India chuan Boeing 787 thlawhtheihna a tir.

He thlawhtheihnaah hian seat 250 chuang awmin, nizan dar 10.30 vel khan India ram an rawn thlen hman beisei a nih thu airline official-te chuan an sawi.

Flight A1 1947 hi nimin zing dar 7:30 khan Delhi aṭanga thlawk chhuakin, chawhnu dar 3-ah Ukraine khawpui, Kyiv-a Boryspil International Airport a thleng a ni.

Russia leh Ukraine inep mek avang leh, Russia-in Ukraine ramria sipai ṭhahnem tak a chhawp avangin indo a chhuah mai hlauhthawnna a lian hle a, hei vang hian Kyiv-a Indian embassy pawhn Ukraine rama India mi zirlai awmte chu chhuahsan turin a lo ngen tawh a ni.

Air India chuan February 22, 24 leh 26-ah Ukraine aṭanga India mi haw duhte tan flight pathum a thlawh tir dawn tih a sawi. Civil aviation ministry chuan India mi haw duh an tam avangin Indian airlines dangte pawh Ukraine-a thlawhtheihna tirh dan tur ngaihtuah turin a ngen tawh bawk.

Thawhṭann zan reiah khan UN Security Council chuan Ukraine leh Russia chungchang ngaihtuahin emergency session a nei a, hetah hian UN-a India Permanent Representative TS Tirumurti chuan Ukraine-a civil mite himna tur ngaihtuah a ṭul thu a sawi. Ukraine ramah hian India mi 20,000 vel an awm meka, an zinga ṭhenkhat chu border area-a cheng an ni tih sawiin, India sorkar chuan a mi leh sate himna chu a ngai pawimawh hle tih a sawi a ni.