'Sikhs For Justice' nena inzawmna nei app leh website block sak

Sorkar laipui chuan pro-Khalistan pawl, ‘Sikhs For Justice’ nena inzawmna nei, rampawna hmunpui nei ‘Punjab Politics TV’ apps, website leh social media account block turin thupek a tichhuak.

Ministry of information and broadcasting chuan Punjab inthlan neih laiin he channel hian online media hmangin vantlang nunphung tihbuai tumah a puh. Ministry chuan channel kaltlanga mipui hmuh theih tura phochhuahte hi hnam inlungrual lohna leh ṭhendarhna thlen thei a nih thu an sawi. An content phochhuahte hi India ram inpumkhatna leh thuneihna tichhe thei, state himna leh vantlang inkaihhruaina tibuai thei a ni, a ti. "Inthlan neih mek thlir chungin app leh social media account thar hi siam an ni," tiin ministry chuan a sawi.

Sikhs For Justice organisation hi Unlawful Activities (Prevention) Act, 1967 hnuaiah dan pawnah hnawl a ni tawh. SFJ hmuchhuaktu leh hotu Gurpatwant Singh Pannun chu India lak aṭanga inlakhranna lam a chawilar avangin UAPA hnuaiah “individual terrorist”-a puan a ni tawh bawk. US-a awmhmun khuarin, 'Punjab Referendum 2020 for Khalistan' tih hmingin Khalistan din phuta UK, US, Canada, Germany leh ram dang eng emaw zata Sikh ṭhalaiten campaign an buatsaih chungchangah pawh chhui chian mek a ni bawk.

"India sorkar chu thil awmdante uluk takin a thlithlai reng a, chanchinthar ṭha leh thianghlim zawk kan neih theih nan, India inpumkhatna leh thuneihna tichhe thei zawnga chetna chu a dodal zel dawn a ni," tiin information ministry chuan a puang a ni.