#MeToo movement vangin union minister MJ Akbar a bang

Ramchhunga #MeToo movement campaign kalpui mekah Union Minister of State for external affairs MJ Akbar chu kum 20 liamta-a journalist leh newspaper editor a nih laia hmeichhe journalist ṭhen-khat chungah mipat hmeichhiatna lam hawia mawi lo taka chea puh a nih avangin a bang. MJ Akbar hi Nilaini khan minister a nihna aṭang hian a bang a ni.

#MeToo movement hi a bikin hnathawhna hmuna mipat hmeichhiat lam hawia inkhawihna leh inchhaihna thleng ṭhin duh lohna leh dodalna lantirna atana kalpui a ni a, he movement kalpui a nih hnu hian hmeichhe tam tak chuan mawi lo taka khawih leh chhaih an nih dante an sawichhuah ngam phah a ni. Kum khat chuang liamta-ah khan American film producer, Harvey Weinstein chu pawngsual leh mipat hmeichhiatna lam hawia mi tam tak khawiha puhna sawichhuah a nih hnuah, US-ah he movement hi kalpui a lo ni tawh a ni. India ramah chuan thla hmasa-a actress Tanushree Dutta-i'n a film chanpui, Nana Patekar-a'n film an chan dun laia a laka mawi lo taka a chet ṭhin thu a sawi chhuah hnuah kalpui ṭan a ni.

India rama #MeToo movement kalpui a nih hnu hian mipa tam tak chu an hnathawhna hmuna hmeichhiate chunga mawi lo taka chea puhna a tam chho hle.

Senior journalist Priya Ramani chuan MJ Akbar chu newspaper editor a nih laia mawi lo taka a chunga cheah a puh hnuah, hmeichhe journalist dang Tishita Patel pawhin kum 1992 leh 1993-a a chunga MJ Akbar chetdan mawi lo tak a rawn sawichhuak ve leh a ni. Ramani-i'n Akbar-a chungchang a sawichhuah hnuah hian 'The Asian Age' newspaper-a thawk, hmeichhe journalist 19-te chuan Priyana Ramani an thlawpna hi an lantir a, an zinga ṭhenkhat chuan an chungah Akbar hi mawi lo taka a lo chet tawh thu an sawi bawk.

Hetihlai hian Akbar chuan an puhna chu thu dik lo nia sawiin, October 15 khan Priya Ramani chuan tihhmingchhiat tuma puhin a lakah defamation case a thehlut a, he thubuai hi nimin khan Delhi-a Patiala House-ah ngaihtuah nghal a ni. Akbar chuan a twitter-ah minister a nihna aṭanga a ban thu hi sawiin, a dikna hailang tura a beih tur thu a sawi. Prime Minister Narendra Modi leh External Affairs Minister Sushma Swaraj-i te chungah ram tana thawk tura hun remchang ṭha an pek avangin lawmthu a hrilh bawk.

Nimina Patiala Court-a Akbar-a defamation case thehluh ngaihtuahnaah hian Akbar hi a inlan lo a, hei vang hian court chuan October 31-a a statement pe tura kal turin a hriattir a ni.