Chhinga Veng dal thei an awm lo

Mizoram Premier League champion lai Chhinga Veng FC chuan an hnuai chiaha awm Electric Veng chu 1-0 in an hneh a, pakhatnaah dinhmun an sawhnghet.

Nimin tlai Lammual inkhelah Lalromawia'n goal awmchhun a khung a, man of the match-ah thlan a ni bawk. Chhingcows hian tun season-ah hneh loh an la tawng lo.

Player che rang
Chhinga Veng coach Lalsang-zuala Hmar-in a sawi lawk angin player che rang bul a ṭantir a; midfield-ah Lalrinchhana leh Lalmuansanga te inkawpin forward Lalrammawia leh midfield thlawp tawn turin MS Dawngliana a awm.

Mual sirah Lalsawmzela leh Romawia te an awm a, Chhing-cows tlarhma an lian lo. Electric Vengin Vanlalremkima (Tetea) chu captain armband hren tirin Isak Vanlalpeka let Emmanuel Lalchhanchhuaha te nen mual laiah an awm ho.

EFC tlarhmaah goal ruk khung tawh David Lalchhuanawma a mal tlat a, Ramhlunchhunga leh Vanlalremsanga te mual sirah an awm thung.

A goal lo
Chhinga Vengin bul an ṭha zawk a, Lalsawmzela cross chu Lalromawia'n hnai tak aṭangin goal zawnah a tauh thei lo a, Electric Veng an vannei.

Electric Veng an insiamrem a, team pahnih an inkhing tawk a, goal chance hmuh tur a tam lo.

Chhinga Vengin freekick chawi loh tumin tlarhnung an fimkhur a, mahse a an inveng seng lo. Kumin MPL-a freekick aṭanga vawi thum khung tawh Isak Vanlalpeka pet chu keeper Zothanmawia chuan dangin a per chu Electric Veng player-ten an khawih hman lo.

First half a nung tawk lo a, goal hmuh tur a awm lo.

A goal ta
First half ṭan chiahah Chhinga Vengin Romawia hmangin an khung nghal a, Samlukhai tlangval hian EFC defender clear ṭhat tawk loh chu goal kilah tak kawh zetin a pet lut.

Team pahnihin midfield-a player an hnawh hnem avangin goal chance insiam an harsat ve ve. EFC midfielder Isak-a freekick pet chu goal zawnah a kal lo a, Chhunga freekick pet erawh goal zawnah kal mah se keeper T. Mawia tan dan a harsa lo.

Chhinga Veng an fimkhur a, goal an neih tawh avangin tlarhnung an ngai pawimawh a, goal a luh belh tawh lo mah se hun tawp hma hreta Isaka freekick pet erawh a hlauhawm teuh hle

Semifinal a chiang?
Champion lai Chhinga Vengin match riat aṭangin point 22 an hlawh chhuak a, semifinal an thlengah a ngaih theih.

Electric Veng erawh Chhinga Veng an hneh loh nawn avangin point 16 an tang a, chetsual chuan knockout stage thleng pha lo thei dinhmunah an ding.