Odisha-in sorkar laipuiah ṭanpuina Rs vbch 1,000 dil

Odisha sorkar chuan kar hmasaa Cylcone Titli tlehin chhiatna nasa tak a thlen tuartute chhawmdawlna turin sorkar laipuiah ṭanpuina cheng vaibelchhe 1,000 a dil.

State sorkar chuan thlipui tlehin chhiatna a thlenah mi 57 in nunna an chan thu sawiin, thlipui leh tuilianin thil a tihchhiat hi cheng vaiblechhe 2,765 hu a nih thu leh, mi nuai 60.11 te a nghawng thu a sawi.

Chief Minister Naveen Patnaik chuan Prime Minister Narendra Modi-a hnenah lehkha thawnin, cyclone tleh vanga an state-in chhiatna nasa tak an tawh chu ngaihtuahpui tura ngenin, chhawmdawlna cheng vaibelchhe 1,000 pe tura a ngen thu a ziak. Patnaik chuan thlipui tleh leh ruahsur nasa vangin chenna in 57,131 a chhiat thu a sawi a, sorkar laipui chuan Pradhan Mantri Awas Yojana (PMAY) hnuaiah in chhe zat sak tharna tur sum a bika pek dan ngaihtuah se a duh tih a sawi bawk.

Patnaik chuan sorkar laipuiah hian preliminary memorandum pawh an thehlut tawh tih sawiin, an sum mamawh zat chu Rs vbch 2,770.28 a ni, a ti. National Disaster Response Fund aṭanga cheng vaibelchhe 2014.09 pe tura an ngen thu leh, a bak chu State Disaster Response Fund-a awmte hman a nih tur thu a sawi.

CM chuan mi tam takin nunna an chan bakah, private leh public property chhia a tam hle a, ram hectare nuai 2.73 a zaua thlai chinna pawh an chhe nasa a ni, a ti. Ganjam leh Gajapati district-ah electrical infrastructure chhia chu a nasa hle a, rural area-ah kawngpui pawh a chhe nasa hle bawk tih a sawi. Hengte hi a rang thei anga thawmṭhat an ngai a ni, a ti. State sorkar chuan a neih ang angin Titli thlipui tleh leh tuilianin a tihchhiatte siamṭhat hna a thawk mek a ni, a ti bawk.

Thlipui tleh hi Gajapati district-in a tuar nasa ber a, Mahendragiri hills-ah leimin nasa tak a thleng bawk a, Barghara khua chu a khaw pumin a min chhe vek bawk niin chief minister chuan a sawi. Tun thlengin chin hriat lohin mi 10 an la awm a ni.