Rajasthan-ah Zika virus vei 106 an tling tawh

Rajasthan state-a Zika virus leng chu mi 106 in an vei tawh a, a vei hriatchian tawh zingah hian naupai lai 25 an awm niin Union Health Ministry official chuan a sawi.

Ningani khan Jaipur-ah Zika vei hi mi paruk hmuh belh niin, a ṭhenawm district-ah mi dang pahnih hmuh an ni bawk.

State chhunga hri vei hmuh belh zel an nih avangin sorkar laipui chuan Nialini khan thil awmdan enfiah turin Indian Council of Medical Research (ICMR) team chu Rajasthan-ah hian a tir tawh a ni.

ICMR expert team hian Jaipur leh a chhehvel district-a Zika virus darh zel tur venna atana thosi thahna atana damdawi hman chu a thlak nghal a ni. Sindhi Camp leh Shastri Nagar-a tho sample lakah Zika virus hi hmuh an ni.

Official-te chuan Zika virus veite hi ṭha taka enkawl an nih hnuah hma an sawn zel niin an sawi a, damlo enkawl pali zinga pathum chuan an damṭha tawk niin an sawi.

State health department official chuan Shastri Nagar leh a chhehvel bialah in nuai khat chuang chu enfiah tawh an ni tih sawiin, team 330 chuan thosi pian theihna tur tui tling awm leh, thosi tui awmte tihchhiat hna an thawk mek a ni, a ti.