RSS hotuin Ram Temple sakna tur dan siam turin phut
Rashtriya Swayamsevak Sang (RSS) hotu Mohan Bhagwat chuan Bharatiya Janata Party (BJP) kaihhruai National Democratic Alliance (NDA) sorkar chu a hma thei ang bera Ayodhya-a Ram Temple sak a nih theihna tura dan siam dan ngaihtuah turin a ti.
Bhagwata-a thusawi hi RSS sawiseltute lam chuan an ngaimawh hle a, kum tawp lama state assembly inthlan neih turte leh nakkum-a Lok Sabha inthlanpui neih tura thlira he thil hi sawi niin an puh.
Ram Temple sak a nih theihna tura dan siam tura ngenna hi a hmaa RSS ho dinna nen a inang lo a, a hma chuan Ayodhya buaina chungchangah Supreme Court thutlukna an nghah tur thu an lo sawi tawh a ni. Supreme Court chuan Ayodhya chungchang hi October 29 aṭangin a ngaihtuah dawn a ni.
Nagpur-a Vijaydashami neihnaa thu a sawiah, Bhagwat chuan Ayodhya buaina chinfel hi ram pum tana thil pawimawh a nih laiin, mi ṭhenkhat politics lama mahni hlawkna duhte sakhaw inkarah politics khelin tun thlengin a la buai phah niin a sawi. Mahse hetichung hian ram neitu tur chu tihfel thuai a ngai tawh a, sorkar pawhin dan fel tak hnuaia temple sak a nih theihna tur kawng hi a siam a ngai tawh a ni, a ti.
BJP thupuangtu GVL Narasimha Rao chuan Bhagwat-a thusawi hi thlawp thu sawiin, Ayodhya-ah chuan Ram Temple a ding ngei tur a ni, a ti. Hetihlai hian eptu lam chuan RSS chu politics lama inrawlh lo turin an ti thung. Congress thupuangtu Pawan Khera chuan RSS chu politics thil sawi ve lo turin a ti a, hemi chungchang buaipuitu hi an awm a ni, a ti. Khera chuan RSS hian a thil phut chungchang chu mipuite rilru tichiai leh buaina chawk chhuak zawnga che loin, sorkar laipui chu a hranin a sawipu mai tur a ni, a ti.
RSS bakah BJP hian Ram tempel sak chungchang hi an lo sawilang fo tawh a, BJP president Amit Shah pawhin Telangana-a party worker-te a kawmnaah kum 2019 inthlanpui neih hmain Ram temple sak hna chu thawh ṭan a nih tur thu a sawi a ni. Hei hi eptu lamte chuan sawiselin, Hindu te vote hui tumna hmanruaah BJP chuan Ram temple chu an hmang niin an puh.