Nitish Kumar kaihhruai Bihar sorkar thar lalut

Bihar-a National Democratic Alliance (NDA) sorkar thar chu nimin tlai khan lakluh a ni a, Janata Dal (United) hruaitu Nitish Kumar chu a zawna a term lina tur  leh a ṭum sarihna atan Chief Minister atan lakluh leh a ni. 

Nitish Kumar rual hian deputy chief minister atan mi pahnih, leh minister ṭhenkhat thu tiam tira lakluh an ni. Lakluh inkhawm hi Patna-a Raj Bhawan-ah neih a ni a,  Governor Phagu Chauhan-a'n rinawmna thu a tiamtir a ni. Union minister Amit Shah leh BJP president JP Nadda-ten an hmanpui. 

NDA sorkar tharah hian deputy chief minister pahnih an awm dawn a, BJP hruaitu pahnih - Renu Devi leh Tarkishore Prasad-te ruat an ni. Sorkar hmasaa deputy CM Sushil Kumar Modi chu thlak a ni a, union cabinet lamah post pek a ni dawn nia sawi a ni.

Chief minister ruala cabi­net minister atana lakluh zingah hian JDU member pali, Hindustani Awam Morcha (HAM)  leh Vikassheel Isaan Party (VIP) member pakhat ve ve, BJP aṭangin Deputy Chief Minister mi pahnih bakah minister atan mi pahnih dang lakluh an ni bawk. CM hian ni reilote hnuah a cabinet hi a tihlen leh nghal rin a ni. 

Bihar Legislative Assembly inthlan neihah NDA hian assembly seat 243 awmah seat 125 an la pha a, majority nei tura seat lak ngai zat chu seat thumin an khum a ni. NDA hnuaia thawk dun, BJP chuan inthlanah hian party malin JDU aiin seat la hnem zawk mah se, inthlan dawna an lo tiam tawh angin, Nitish Kumar chu Chief Minister atan dah chhunzawm a ni leh ta a ni.  BJP hian seat 74 lain, JDU hian seat 43 a la. 

Pathianni khan NDA MLA thlan tharten meeting neiin, Nitish Kumar hi hruaitu atan lungrual takin an thlang leh a ni. Meeting hi senior BJP leader leh defence minister Rajnath Singh-a'n a telpui. 

NDA sorkar thar lakluh inkhawm hi Rashtriya Janata Dal  (RJD) party kaihhruai, eptu ṭangrual pawl Mahagathbandhan chuan a boycott. 

Mahagathbandhan-ah hian party panga - RJD, Congress, CPI-ML, CPI leh CPI(M) an tel a ni. Inthlanah eptu ṭangrual pawl hi chak zo lo mah se, RJD hi party mala seat la hnem ber niin, seat 75 a la a ni. 

RJD chuan Nitish Kumar chu phatsanna avanga Chief Minister a ni tiin, a kaihhruai NDA sorkar chu centre lamin duh duh anga an thunun, puppet government a ni, a ti. 

Inthlan neih zawh takah an candidate 20 chuang zet chu vote tlemte chauha an chak loh avangin RJD chuan vote chhiar danah thil fel tawk lo a awm nia sawiin, court-ah zualko an tum tih an sawi bawk.