Thla li chhunga hri kai hmuh chhuah tlem ber ni thleng
India ramah Pathianni khan Covid-19 kai hmuh chhuah thar mi 30,548 awmin, hei hi thla li chhunga ni khata hri kai hmuh thar tlem ber ni a ni.
Ministry of health and family welfare (MoHFW) chuan Pathianni thleng khan ram pumah hri kai hmuh tawh mi 88,45,127 an awm thu a tarlang. Pathiannia hri kai thar mi 30,548 hmuh an nih rualin, hemi ni veka hri kai enkawl dam hi mi 43,851 an awm bawk. Hripui thihpui mi 435 awm belh lehin, Covid-19 vanga thi mi 1,30,070 an tling tawh.
Health ministry chuan India rama Covid-19 vanga thi zinga 70% chuang chu natna benvawn lo neisa an ni tih a sawi. Hripui vanga thi tam zualna te chu - Maharashtra-ah mi 45,974, Karnataka-ah 11,529, Tamil Nadu-ah 11,478, West Bengal-ah 7,661, Delhi-ah 7,614, Uttar Pradesh-ah 7,371, Andhra Pradesh-ah 6,868, Punjab-ah 4,458 leh Gujarat-ah mi 3,803 in an thihpui tawh a ni.
Covid-19 hri leng thawhthumna Delhi-ah thleng mek
Delhi health minister Satyendar Jain chuan Delhi-ah Covid-19 hri leng thawh thumna a thlen mek thu sawiin, hri leng mah se lockdown puan tumna a awm loh thu a sawi bawk.
Kum dang ang bawkin ṭhenawm state-a thlai ro hal khu avangin Delhi-ah hian boruak bal a nasa leh hle a, hei hian hri leng a tihpunlun phah theih thu leh thi an tam phah theih thu mithiamte chuan an lo sawi tawh a ni. Hri leng chungchangah hian nimin khan health minister chuan Delhi-ah hian hri leng thawh thumna a thlen mek thu a sawi a, hri kai thar hi tam chho zel mah se lockdown puan vangin a rem phah loh thu a sawi a, hmaituamna hman chu a pawimawh viau a ni, a ti.
Pathianni tlai khan union home minister Amit Shah hoin Delhi-a Covid-19 leng mek tihziaawm a nih theih dan ngaihtuahin meeting neih a ni a, he hunah hian Delhi chief minister Arvind Kejriwal pawh a tel. Meeting-ah hian Kejriwal chuan hri kaite enkawlna turin sorkar laipui chuan DRDO centre-ah ICU khum 750 a pek theih thu a sawi a, Delhi-ah ni tinin mi nuai khat chuang Covid-19 test neih pui ziah tum a nih thu a sawi bawk.
Kejriwal chuan, "Delhi-ah hian ni tin mi 60,000 bawr vel chu test neih pui ziah a ni a, mahse test hi nuai khat chuangah tihpun chhoh tum a ni. October 20 aṭang khan hri kai thar an pung nasa chho ṭan hle a, damdawi-ina khum mutna turah buaina la awm lo mah se, ICU-a khum erawh indaih lohna a thleng chho mek a ni.
Hei vang hian sorkar laipui chuan DRDO centre-a ICU khum 750 chu Delhi sorkar tan a pe dawn a, heng zinga 500 chu peihfel ni tawhin, a dang 250 chu a hnu lamah sorkar laipuiin min pek a tum leh a ni," a ti.