Amritsar-ah relin mi 59 chil hlum

Punjab-a Amritsar-a Joda Patak area-ah kar kalta Inrinni khan Hindu festival, Dusshera lawmna thlira rel kawnga dingte chu rel tlanin a chil a, mi 59 an thi a, midang 90 chuangin hliam an tuar bawk.

Dusshera lawm tur hian Joda Patak-ah mi tam tak an pungkhawm a, Hindu pathian Rama-an ramhuai lal, lu 10 neih Ravana a hnehna ni, ṭhatnain sualna hnehna ni lawmna pual hian Ravana limte hal niin, halmawite an hal bawk. Hetianga milimte hal a nih avang hian a hnaihvaia awm chu a him tawk loh hlauin, mi tam tak chuan a bul rel kawng aṭang hian an lo thlir a ni. Rel kawnga ding tam tak hian an moble phone-a thla te an lo lak avang leh, thawm ri a tam avangin rel chak taka rawn tlan thawm hi an hriat loh bakah an lo hmu lo nia sawi a ni. Rel hi Jalandhar aṭanga Amritsar pana tlan a ni.

Official-te chuan relin a chil hlumte hian an nihna hrechiang vek tur chuan hun eng emaw chen a ngai dawn niin an sawi.

Punjab Chief Minister Amarinder Singh chuan chhiatna thleng chu pawi a tih thu leh, a lungchhiat thlak thu a sawi a, hliam tuarte enkawlna kawngah official-te chuan an theihtawp an chhuah tur thu a sawi. Vanduaina thlen dan chu chhui chiang turin thupek a tichhuak nghal bawk. Hliam tuar zingah ṭhenkhat hi an dinhmun a ṭha lo hle a, thi zat pawh hi an la pun rin a nih thu official-te chuan an sawi.

Railway board chairman Ashwani Lohani chuan Amritsar-a chhiatna thlengah railways chu mawhphurtua puh ngawt theih a ni lo tih a sawi a, rel kawng bula hun hman tur chungchang chu engmah hriattir an ni lo tih sawiin, rel kawngah mipuite an awm dawn tih pawh an rin loh thu a sawi. He chhiatna thlen dan hi rel chetsualna vang ni loin, rel kawngah dik lo taka mipuite an lo awmkhawm vang a nih avangin Commissioner of Railway Safety (CRS) pawhin a chhui zui dawn lo tih a sawi. Mahse tualchhung mite chuan Dusherra a piangin rel kawng bula hun hman a nih thu leh, milim hal ṭhin chu an tih dan ṭhan a ni thu an sawi thung.

Nimin khan Joda Patak-ah hian tualchhung mite chuan rel kawngah lungawi lohna lantirin, CM Amrinder Singh kaihhruai sorkar laka an lungawi loh thu leh, mi tam tak chilhlumtu rel driver chunga action lak an phut thute an sawi. Nawrh huaihawtnaa buaina chhuak tur veng turin Punjab Police tirh an ni a, Rapid Action Force pawh an awm tel bawk.