CBI-in an Special Director lakah FIR thehlut

Investigation agency, Central Bureau of Investigation (CBI) chuan an Special Director Rakesh Asthana chu thamna sum laknaa inhnamhnawiha puhin a lakah FIR a thehlut.

1984 batch IPS officer Gujarat cadre, Asthana hi eirukna leh sum lakluhna zeprua puha thubuai eng emaw zat nei lai, sumdawng Moin Qureshi hnena aṭanga thamna cheng vaibelchhe hnih dawngah puh a ni.

Agency hian thamna sum peknaa palai atana hman, Manoj Kumar an man hnua thu an zawhfiahnaah Asthana hnenah hian cheng vaibelchhe hnih a pe ngei tih a sawi vangin FIR hi an thehlut a ni. Manoj hian Qureshi-an pawisa hi a pek tir niin a sawi.

Hetihlai hian Asthana hian RJD hruaitu Lalu Prasad Yadav-te chhungkua eiruknaa inhnamhnawiha a puh avangin CBI Director Alok Varma lakah complaint a lo thehlut tawh a ni. Mahse agency chuan thuchhuah siamin, Director lakah hian complaint thehluh a ni lo a, Special Director zawk hi thubuai paruk velah chhui chian mek a nih thu a tarlang.