PM-in National Police Memorial a hawng

Prime Minister Narendra Modi chuan nimin zinga khan New Delhi-ah National Police Commemoration Day pualin National Police Memorial a hawng.

PM Modi chuan police station enkawltute chuan complaint thehlut ṭhinte an ngaihsak ṭha a nih chuan mipuite chuan pawikhawihna thleng ṭhin tihziaawm a nih theih nan police te chu an pui peih reng niin a sawi. "Police station-a duty te chuan complaint thehlutte chu ngaihsak a, tui in tur ringawt an lo pe a nih pawhin khawtlang mipuite nena an inkar boruak chu a ṭha chho mai dawn a ni. Mipuite an lo ngaihsak ṭha a nih chuan mipuite chuan ṭha takin an lo thawhpui mai dawn a ni", a ti.

October 21 hi kum 1959-a China sipaiten Ladakh-a Hot Spring-a police an thatte hriatrengna atan kumin tin Police Commemoration Day atan hman zui a ni.

Modi chuan National Police Memorial chuan India-in zalenna a neih hnua ram tana nunna hlantu police-te inpekna hriatrengna atana siam a nih thu a sawi. He hmun hi Central Delhi-a Chanakyapuri area-a ram acre 6.12-a zauah siam niin, feet 30-a sang, tone 238-a granite hmanga siam lung phun a awm. Wall of Valour-ah police matar hming 34,844 te hming ker a ni bawk.

Intelligence Bureau Director Rajiv Jain chuan India ram a independence hnu khan central leh state police force mi 34,844 ten an duty-na hmunah an nunna an chan tih sawiin, nikum chhung khan duty laia thi police hi mi 414 an awm bawk tih a sawi.