Rajasthan-ah Zika vei paruk hmuh belh leh

Rajasthan-a Jaipur district-ah Pathianni khan Zika virus vei mi paruk hmun belh leh an ni a, heng mite nen hian Zika vei hmuhchhuah hi mi 123 an tling tawh niin sorkar official chuan a sawi.

Zika vei hmuhchhuah te hi enkawl nghal an ni a, an zinga mi 105 chu an dam ṭha tawh a ni.

State health department chuan nu naupai lai zinga Zika vei an awm leh awm loh enfiah a, zirchiang turin member panga awmna committee a din tawh bawk a ni. Committee hian director public health hnenah report a thehlut ṭhin dawn a ni.

Rajasthan-a Zika virus vei hmuh zinga a tam zawk hi Jaipur-a Shastri Nagar area-a cheng an ni a, he bialah hian hri darh zel tur venna atan thosi hlo kah a ni bakah, thosi tui leh thosi pian theihna tuitlingte tihchhiat an ni bawk.

Zika virus hi thosi chi khat aedes aegypti mosquito aṭanga kai theih a ni a, a veite chuan khawsik sang, vun thak, ruh chuktuah leh tha na te an nei a ni. Naupai laiin he hri hi a kai a nih chuan a naupaiah rualbanlohna a thlen thei a, pianphung pangngai aiin an lu a te zawk a ni.

India rama Zika virus hmuh hmasak ber chu kum 2017 January thla khan Ahmedabad-ah a ni a, hemi kum July thlaah Tamil Nadu-a Krishnagiri district-ah vei hmuh leh a ni. Mahse heng hmuna hri lengte hi uluk taka enfiah a nih hnuin hmun danga darh loin an khuahkhirh thei a ni.

Rajasthan-ah Zika virus vei hmuh belh an nih tak zel avangin a ṭhenawm, Uttar Pradesh chuan airport official an state-a lutte chu Zika virus lakah an fihlim em tih enfiah a, fimkhur turin a chah.

Director, communicable diseases (UP), Dr Mithilesh Chaturvedi chuan dengue virus thlentu, aedes aegypti chu Zika virus thehdarhtu a ni bawk tih sawiin, hetiang thosi hi an state-ah an awm avangin fimkhur a ngai hle tih a sawi. Dr Chaturvedi chuan Airport Authority of India (AAI) hnenah Lucknow airport leh state chhunga airport dangahte invenna ṭha taka kalpui turin a ngen.

Lucknow Municipal Corp-oration (LMC) leh chief medical officer (CMO) chuan Lucknow khawpui chhungah Ziak virus hi hmuh a la ni lo tih an sawi a, mahse he hri vei pawh hi hun eng emaw chen langchhuak thei loin an awm thei tih an sawi. Hei vang hian a bikin Rajasthan-a Zika hri lenna bial a ṭanga kalte chu uluk taka enfiah an ngai tih an sawi.